Press Release

கோவை தொண்டாமுத்தூரில் உள்ள ரவிராஜ் நுண்கலைக் கல்லூரியில் இன்று ஓவியக் கண்காட்சி தொடங்கியது. கோயம்புத்தூர் தொண்டாமுத்தூரில் அட்டுக்கல் பகுதியில் உள்ள ரவிராஜ் நுண்கலைக் கல்லூரியில் 17 ம் ஆண்டு ஓவியக் கண்காட்சி சிறப்பாக துவங்கியது. ரவிராஜ் நுண்கலைக் கல்லூரியின் இணை பேராசிரியர் திரு. ஆர். விக்னேஷ்ராஜ் வரவேற்புரை வழங்கினார். தங்கமயில் ஜுவல்லரி யின் நிர்வாக இயக்குனர் திரு. பா. இரமேஷ் அவர்கள் ஓவியக்கண்காட்சியினை துவக்கி வைத்து ஓவியர்களுக்கு விருதுகள் வழங்கினார். ஏ பிளஸ் ஆர் ஆர்கிடெக்ட்ஸின் நிறுவனர் திரு. ராகவ் அவர்கள் ஓவியர்களின் கையேடு ஒன்றினை வெளியிட்டு கலைஞர்களுக்கு பரிசுகள் வழங்கினார்.

இந்நிகழ்ச்சியில் மிக சிறப்பாக ஓவியங்கள் தீட்டிய ஓவியர்களுக்கு விருதுகள் வழங்கப்பட்டன. இதில் ‘சிறந்த படைப்பு கலைக்கருக்கான விருது’ திரு. எம். காசி ஈஸ்வரன் அவர்களுக்கு வழங்கப்பட்டது. ‘2025 ஆண்டின் சிறந்த ஓவியருக்கான விருதுகள்’ – தர்மினி, கே. அஜய், ஜி. கே. சந்திரசேகர், ஏ. எஸ். ரஞ்சு ஆகியோருக்கு வழங்கப்பட்டன. மேலும் ‘உசாத்துணை விருது’ ஜி. கனிஷ்காவிற்கு வழங்கப்பட்டது.

தமிழக கிராமியக்கலைகள் மற்றும் பாரம்பரிய காட்சிகளை திரு. காசி ஈஸ்வரன் செதுக்கிய சித்திரத்தில் மிக நுணுக்கமான ஓவியங்களை நம் கண்முன்னே நிறுத்தி வியக்க வைக்கிறார்.

ஓவியர் தர்மினி அவர்கள், மதுரையின் அரசி, சித்திரைத் திருவிழா, அழகர், சுந்தரேஸ்வரர், நரசிம்மர், தமிழ் கடவுள் முருகன் போன்ற ஓவியங்களை வரலாற்று பின்னணியுடன் மிக நுணுக்கமான வெளிப்பாடுகளில் அக்ரிலிக் வண்ணத்தில் அசத்தியிருக்கிறார். மேலும் தர்மினி அவர்கள் அண்மையில் தமிழக அரசின் கலை பண்பாட்டுத்துறையின் சிறந்த கலை புத்தகம் எழுதியமைக்கான விருது பெற்றுள்ளார்.

ஓவியர் திரு. அஜய், தனது சுய உருவத்தை கரிகால் சோழனாகவும், அல்லாவுதீன் கில்ஜியாகவும் சித்தரித்துள்ளார். மேலும் கல்லூரி சுற்றுலாவின் போது தன்னை மிகவும் ஈர்த்த கஜுராஹோ சிற்பங்களை ஓவியங்களாக திட்டியுள்ளார்.

திரு. சந்திரசேகரின் கலைப்படைப்பு “டாஃபோடில்” என்ற மலரால் ஈர்க்கப்பட்டுள்ளது. இது அன்பின் நீடித்த சக்திக்கான உருவகமாக தனது வாழ்வின் சொந்த அனுபவங்களையும் கலந்து ஓவியங்களாக்கியுள்ளார்.

‘உலகின் தொன்மையான சமுதாயங்கள்’ என்ற தலைப்பில் தமிழ், சீன, எகிப்து, சுமேரிய, மாயன், மற்றும் கிரேக்க மொழிகளின் மற்றும் பாரம்பரியங்கள் வெளிப்பாடாக ஓவியர் ரஞ்சு அவர்களின் ஓவியங்கள் பிரதிபலிக்கின்றன.

புதுமையான வகையில் ‘இயங்கு ஓவியங்களை’ ஓவியர் கனிஷ்கா உருவாக்கியுள்ளார். ஆணின் துயரம், பெண்ணின் துயரம், இயற்கை அன்னை, ஒரு முத்தத்தின் ஆச்சர்யம் மற்றும் ஒத்திசைவு போன்ற தலைப்பில் இடம்பெற்ற இவரது ஓவியங்கள் பார்வையாளர்களை வெகுவாக கவர்ந்துள்ளது.

நிகழ்ச்சியின் நிறைவில், வண்ணக்கலைத்துறையின் தலைவர் திரு. முருகேசன் அவர்கள் நன்றியுரை வழங்கினார்.